2022-04-01 Domingos Soares 2

Tinan 2022 sai hanesan Tinan Histórica ida ba Rai Ataúro, rai ne'ebé mak koñesido ou hakerek iha karta no Mapa ho naran "Pulau Kambing" Tamba iha Tinan ida ne'e liu husi Sirkunskrisaun administrativa ho primeiro eskalaun nian maka Ataúro hetan definisaun hanesan Município ida iha Rai Timor-Leste liu husi Lei no.14/2021 ne'ebé hetan alteração daruak sai Lei no.11/2009 konaba Divisão Administrativa Território. No ohin iha Rai Ataúro ne'e rasik Sua Excelência Ministro Administração Estatal acompanha husi Vice-Ministro no Diretores Gerais no nacionais husi Ministériu Central mai hamutuk iha Ataúro hodi halao Cerimónia tomada de posse ba Administrador Município Ataúro nian. Iha Cerimónia Tomada de Posse ne'e Ministro Administração Estatal hatete katak Administrador Munisipal maka reprezentante governu nian iha munisípiu no nia maka simu knar atu diriji Administrasaun Munisipal, hodi assegura normal funsionamentu ba servisu hirak iha administrasaun lokal Estadu nian iha munisípiu, hodi hatan, liu hosi ninia atividade, ba membru Governu responsável ba. Hanesan reprezentante Governu nian iha nível Munisipal, maka Administrador Munisipal Ataúro, sei diriji no hala’o, kompeténsia hirak ne’ebé Governu deskonsentra ona ba munisípiu sira. Ministro Administração Estatal ne mos hatutan tan katak ba mandatu ida ne’e bele mosu, dezafiu hirak boot atu nune bele assegura katak servisu administrasaun públika ne’ebé deskonsentra ona ba munisípiu foun, bele implementa hotu, hodi bele garante atu alkansa objektivu hirak hosi desentralizasaun administrativa tuir refere iha PEDN 2011-2030, hanesan (i) atu garante dezenvolvimentu setor privadu iha área hirak rural (ii) atu kria oportunidade sira ba partisipasaun demokrátika iha nível lokal (iii) Atu promove harí Estadu ida forte; no (iv) atu assegura harí prestasaun servisu públiku ida efetivu, efisiente no ekuitativu liu. Atu finansia programa no projektu hirak ne’e, ne’ebé anual no plurianual, sosiu-ekonómiku no sustentabilidade ambiental no destina ba dezenvolve territoriu no populasaun Munisípiu Ataúro nian, maka aprova tiha ona iha Konsellu Ministrus, iha 30 março, tuir hakerek iha artigu 15.º Lei n.º 1/2022, loron 3 fulan Janeiro, konaba Orsamentu Jeral Estadu ba 2022, Dekretu-Lei ne’ebé Kria Fundu Espesial Dezenvolvimentu ba Ataúro (FEDA). Ministro Administração Estatal ne'e mos esklarese ba Eselentíssimu Señor Administrador Munisipal Ataúro ne’ebé ohin Simu Posse katak ninia misaun maka atu organiza servisu sira iha administrasaun lokal atu nune’e, hodi koordena ho servisu sentral administrasaun públika nian sira, bele garante katak prestasaun servisu públiku sira ba komunidade bele sai ekuitativa, efetiva no efisiente liu. Ida ne’e hanesan responsabilidade ida importante tebes ba moris sidadaun sira nian iha munisípiu. Servisu no misaun ne’ebé nia simu ne’e, iha ejijénsia boot konaba sakrifísiu no dedikasaun. Señor Administrador Munisipal tenke prontu atu simu responsabilidade no dezafiu hirak ne’e.