2021-10-15 Meligo 2
BOBONARO, 15-10-2021-Mundu tomak nune’e mós Timor-Leste ohin (loron 15 fulan outubru) komemora loron Internasionál Feto Rurál hodi valoriza papél feto rurál sira iha hasa’e dezenvolvimentu agrikultura, suku rezilénsia ai-han no hamenus kiak iha área rurál. Atu valorize loron importante feto sira iha área rurál Sekretária Estadu ba Igualdade no Inkluzaun (SEII), Sra. Maria José da Fonseca Monteiro de Jesus ho reprezentante instituisaun governu no parseria bilaterál no multilaterál sira hamutuk ho komunidade Postu Administrativu Cailaco komemora loron Internasionál Feto Rurál ho Tema: “Dezenvolve Feto Rurál Atu Asegura Ai-han Di’ak ba Ema Hotu” iha Administrasaun Postu Administrativu Cailaco. Objetivu hosi komemorasaun ne'e atu hasa'e konxiénsia ema hotu nian kona-ba kontribuisaun feto rurál sira iha Dezenvolvimentu sira nia suku no papél importante hirak ne'ebé sira halo hodi hasa'e produsaun agrikultura, prepara ai-han di'ak ba ema hotu no kontribuisaun sira nia ba hamenus ki'ak iha rai-laran. Sekretária Estadu ba Igualdade no Inkluzaun iha nia intervensaun hateten katak, liuhosi komemorasaun loron internasionál feto rurál ita hakarak atu hasa’e konxiénsia luta maluk feto iha área rurál, ita hakarak hasa’e konxiénsia kona-ba nesesidade oioin ne’ebé sira iha, nesesidade ne’ebé hanesan ho maluk maluk feto sira iha urbana. “Ohin loron ita komemorasaun loron internasionál feto rurál, ita hakarak atu timoroan hotu iha área geográfika ida-ne’ebé de’it atu nia feto ka mane, portadora defisiénsia ka lae, maluk sira hosi komunidade LGBTQI, ita hakarak ema hotu iha timór bele goza sira-nia moris hanesan timoroan ne’ebé livre no la hetan diskriminasaun. Ita hakarak asegura fornesimentu serbisu oioin ne'ebé fornese ba timoroan tenke fó oportunidade hanesan ba timoroan hotu atu asesu no la hetan diskriminasaun ho baze iha saida de’it,” dehan Maria José da Fonseca Monteiro de Jesus. Iha sorin seluk, reprezentante Prezidente Autoridade Munisípiu Bobonaro, Diretora Serbisu Munisipál Asaun Sosiál, Sra. Eurosia Maria M. D. Sarmentu, iha nia intervensaun hateten katak partisipasaun feto rurál importante tebes iha sósiu-ekonómiku, agrikultura no dezenvolvimentu investimentu. “atu fó hanoin ba inan-feto sira hotu katak partisipasaun feto rurál importante tebes ba iha dezenvolvimentu investimentu. Partisipasaun Feto rurál importante tebes iha dezenvolvimentu ekonómiku, agrikultura no investimentu iha área rurál sira”, tenik Diretora Eurosia. "Ami kontente tanba bele ona hili Postu Cailaco atu komemora loron Internasionál feto rurál no ami kontente tanba ami nia produtu lokál ohin folin di'ak". "Hein katak eventu hanesan ne'e bele halo nafatin iha ami nia fatin", dehan Maria Gomes, komunidade feto rurál ida-ne'ebé fa'an produtu lokál iha komemorasaun refere. Atividade ne’ebé hala’o hodi komemora loron internasionál feto rurál ne’e maka publikasaun ba loron refere iha mídia sira, espozisaun ba produtu ai-han lokál no iha mós sesaun diálogu ho komunidade sira ne’ebé aprezenta hosi oradór/ora sira hanesan Reprezentante feto rurál ho nia tópiku Impaktu Programa sira kona-ba hakbiit Feto Rurál, Diretór-Jerál SEII Sr. Armando da Costa ho tópiku Investimentu Inkluzivu, reprezentante SEKOOP ko’alia kona-ba polítika Setór Kooperativa ba Feto Rurál, Prezidente Konsellu Administrasaun BNCTL Sr. Brígidio de Sousa hato’o kona-ba Investimentu Kooperativa ba Feto Rurál, reprezentante MAP nian ko’alia kona-ba Investimentu ba Ekonomia Rurál liuhosi hasa’e Produsaun Ai-han Lokál, ba polítika MAP no Deklarasaun Maubisse Faze Daruak.
Partisipa iha eventu ne’e mai hosi reprezentante Veteranu/a, Komandante PNTL Bobonaro, ONG nasionál no Internasionál, instituisaun governu, relijiozu, komunidade no inan feton iha área rurál iha Postu Cailaco.
Relevante Bilder
Relevante Artikel
MeligoMeligo (Miligo) ist ein osttimoresischer Suco im Verwaltungsamt Cailaco. .. weiterlesen