2021-02-24 Abel de Conceição, Adm. Aileu

Ministru Administrasaun Estatal (MAE), Dr. Miguel P. de Carvalho ho Vice Ministru Lino de Jesus Torrezão fo Tomada de Posse ba Administrador Munisipiu Aileu, Abel da Conceição, partisipa husi Membru Governu, Veteranus no komunidade sira, iha Salaun Timor Rai Klaran Aileu, 23/02/2021. Tuir Ministru Administrasaun Estatal (MAE), Dr. Miguel Pereira de Carvalho informa reflesaun ne’e hanesan simbolu husi governu sentral hodi fo nia konfiansa ba reprezentante foun ida atu hahu asumi kargu iha munisipiu Aileu husi periodu 2021-2026 atu substitui Administrador sesante hodi konklui nia mandatu hanesan governu sentral iha munisipiu. “Administrador atual Abel da Conceicão sei hala’o nia funsaun Estadu, governu Sentral nian iha munisipiu ho fuan tomak hodi garante servisu publiku hotu-hotu ne’ebé mak ita nia populasaun sira presija atu hetan hanesan bee mos, Estrada, eletrisidade no agrikultura ne’ebe funsiona ba komunidade sira”hateten Ministru MAE. Ministru hatutan nia iha konviksaun katak ho politika governu agora nian hakarak deskonsentra tan laos deit kompetensia maibe rekursus atu munisipiu sira bele hala’o funsaun administrasaun kargu estadu no prosesu desentralizasaun bele la’o ho lalais no di’ak liu tan.

“Ministeriu Estatal planeia ona munisipiu sira ba iha segundu faze dezentralizasaun Administrativa hodi transforma munisipiu sira atu sai hanesan institutu publiku orgaun Estadu nian atu iha tinan balu bele transforma sira ba iha poder  lokal, maibe buat sira ne’e presiza tempu no rekursus sira ne’ebé mak governu sentral sei produz barak liu tan iha munisipiu atu sira bele ezerse sira nia funsaun no kompetensia ne’ebé konstitui ona iha dekretu lei Nu. 3/2016 ho di’ak liu tan” haktuir Ministru iha loron 23/02/2021