2022-10-04 Henrique da Costa

Dili, 04 outubru 2022 (SRP) – Komandante Komandu Munisipiu Dili, Superintendente Xefi Polisia Henrique da Costa, informa katak edifisiu Eskuadra PNTL Dom Aleixo, ne’ebé lokaliza iha area Aimutin-Comoro, Postu Administrativu Dom-Aleixo, Munisípiu Dili sei muda provizoriu ba iha Kolejiu PNTL iha Sentru Formasaun Polisia (CFP; sigla portuges)- Comoro. “Atu informa deit katak, konstrusaun foun ba Eskuadra PNTL Dom Aleixo hahu halo ona no daudaun ne’e muda provizoriu mai iha Kolejiu PNTL Comoro. Tanba ne’e atu informa ba komunidade sira ne’ebe hela iha area Comoro karik atu mai hatama keixa ruma ka trata dokumentus ruma bele mai direta Kolejiu PNTL besik kedas Kapela PNTL nian sorin”, informa Henrique, iha nia knar fatin Komandu Munisipiu Dili, tersa feira ne’e. (04/10/2022). Nia dehan, mesmu fatin muda ona maibe Komandante Eskuadra Dom Aleixo hamutuk ho nia membru sira nafatin halo servisu hanesan baibain. “Agora daudaun ita hetan apoiu transporte hosi Gabinete Vise-Ministru Interior, Kuartel Jeral no Komandu Munisipiu Dili rasik hamutuk ho rekursu ne’ebe iha komesa lalin ona ekipamentu servisu sira ne’e ba iha Kolejiu PNTL Comoro nune’e orsida kalan sir abele hahu servisu provizoriu iha ne’eba”. Subliña.